Terapia PRP (Plazma e Pasur me Trombocite) - Klinika Dermolife
Terapia PRP (Platelet-Rich Plasma) është një procedurë rigjeneruese, e përdorur gjerësisht në mjekësinë estetike dhe dermatologji për të stimuluar proceset natyrale të shërimit dhe rigjenerimit të indeve. Në trajtimin e rënies së flokëve, PRP përdoret për të përmirësuar cilësinë e flokëve ekzistues, për të forcuar folikulat dhe për të ngadalësuar procesin e rënies. Duke qenë një terapi autologe, PRP përgatitet nga gjaku i vetë pacientit, duke e bërë procedurën të sigurt dhe të mirë-toleruar.
Analiza e FlokutÇfarë është PRP?
PRP është plazmë e përqendruar që përmban një nivel të lartë trombocitesh, të cilat janë të pasura me faktorë rritjeje dhe proteina bioaktive. Këta faktorë rigjenerojnë indet, përmirësojnë qarkullimin e gjakut dhe stimulojnë aktivitetin qelizor.
Procesi i përgatitjes së PRP-së përfshin marrjen e një sasie të vogël gjaku nga pacienti, e cila më pas centrifugohet për të ndarë plazmën e pasur me trombocite nga komponentët e tjerë të gjakut. Plazma e përftuar përdoret menjëherë për injektim në zonën që do të trajtohet, duke ruajtur kështu aktivitetin biologjik maksimal.
Si funksionon PRP?
PRP vepron duke aktivizuar mekanizmat natyralë të rigjenerimit të trupit. Pas injektimit në lëkurë, faktorët e rritjes të çliruar nga trombocitet:
- përmirësojnë furnizimin me gjak
- stimulojnë metabolizmin qelizor
- zgjasin fazën anagjene (fazën e rritjes së flokut)
- ndihmojnë në forcimin e rrënjës së flokut
Si rezultat, flokët ekzistues bëhen më të fortë, më të trashë dhe më rezistentë ndaj rënies.
Sa seanca PRP duhen për të marrë rezultat?
Numri i seancave të nevojshme ndryshon në varësi të gjendjes së flokëve, shkakut të rënies dhe përgjigjes individuale të organizmit. Në shumicën e rasteve rekomandohet:
- një cikël fillestar prej 3 – 4 seancash, të kryera çdo 3 – 4 javë
- seanca mirëmbajtëse çdo 4 – 6 muaj.
Përmirësimet e para në cilësinë e flokëve zakonisht shihen pas 2–3 muajsh, ndërsa rezultatet më të dukshme shfaqen gradualisht me vazhdimin e trajtimit. Vlerësimi bëhet gjithmonë individual, pas konsultës mjekësore.
Terapia PRP, Mesoterapia dhe Minoxidil për rënien e flokëve
Ekzistojnë metoda të ndryshme për të ngadalësuar rënien, stimuluar rritjen e flokëve dhe përmirësuar densitetin. Më poshtë krahasojmë tre nga trajtimet më të përdorura: PRP (Plazma e Pasur me Trombocite), Mesoterapia dhe Minoxidil.
PRP, Mesoterapi apo Minoxidil - Kush jep më shumë rezultat?
| Trajtimi | Lloji i trajtimit | Qëllimi | Procedura | Rezultatet e dukshme |
|---|---|---|---|---|
| PRP | Biologjik, autolog | Forcim i folikulave ekzistuese, rigjenerim i lëkurës | injektim | 2–3 muaj pas trajtimit fillestar |
| Mesoterapia | Vitaminike / Nutriente | Ushqyerje dhe stimulim rritjeje | injektim | Varet nga reagimi individual, zakonisht 2–3 muaj |
| Minoxidil | Topikal, medikamentoz | Ngadalësim i rënies dhe forcim i flokëve | aplikim i përditshëm në shtëpi | 3–6 muaj me përdorim të rregullt |
Cila metodë është më e përshtatshme?
- PRP rekomandohet për ata që duan një trajtim natyral, rigjenerues dhe pa mjekime, veçanërisht kur flokët ekzistues janë të shëndetshëm.
- Mesoterapia është një opsion ushqyes dhe stimulues. Zakonisht kombinohet me PRP.
- Minoxidil është i përshtatshëm për përdorim të përditshëm dhe si trajtim parandalues, por kërkon disiplinë dhe mirëmbajtje të vazhdueshme.
Shumë specialistë të fushës përdorin kombinime të këtyre trajtimeve për rezultate më të dukshme, duke filluar me PRP për rigjenerim dhe Minoxidil ose Mesoterapi për mirëmbajtje dhe forcim të flokëve.